Граѓанско Демократската Унија во целост ги поддржува напорите на СОНК во нивната намера да организираат предупредувачки штрајк со почетокот на школската учебна година, се вели во соопштението од Граѓанско Демократска Унија- ГДУ.
Како што духовито забележува еден твитерџија – Еден наставник треба да работи 300 години да ги земе парите од патните трошоци на Силвана Бонева – Ние би додале, а ако ги додаме и оние од Мира Дизел...
Секоја „владина гарнитура” помпезно најавува некакви реформи во образованието кои најчесто се од бирократски карактер – наставниот кадар во моментов е во категоријата „даватели на услуги во јавен сектор” – што и да значи ова, само ја потврдува безидејноста и сувопарноста на „реформаторите” кои сѐ уште не можат да ги видат потребите ниту на учениците,ниту на наставниците.
Оттука, ние во ГДУ не само што му сугерираме на ресорното министерство да види колку се платени просветните работници во регионов, туку му обрнуваме внимание и на неприфатливиот статус на истите во рамките на државните/јавните службеници.
Министерството не стори никаков напор за соодветно хармонизирање на законодавстото туку и понатаму функционира како самодоволен организам кој е далеку од својата основна функција.
Затоа, со чесни исклучоци, македонската јавност може да прочита дека се затвораат училишта во Хрватска, но за оние кои се затвораат во Македонија – како во Велес на пример, таквите вести не соодејствуваат со општиот блесок на напредок, веројатно.
Почетокот на учебната година не e повод за организирање „шпалири", „фото сесии" за „првенците на локалните самоуправи" и слични соцреалистични „пригодни настани".
Разочарувачки, но, „реформите” во образованието се сведуваат на оставката на заменик министерот и познатата фраза – учениците ќе ги добијат учебниците до крајов на годината. - Веруваме дека за многумина во земјава ова е нептифатливо, се вели во соопштението од Граѓанско Демократска Унија- ГДУ.