Генералната директорка на РТС поднесе оставка

Мања Грчиќ денеска околу 17:30 часот поднела оставка од функцијата генерална директорка на Радио-телевизија Србија (РТС), јавува Telegraf.

Оставката ја поднела по разгледување на актуелните околности во кои работи јавниот сервис. Таа оценила дека најважно за институцијата е да се обезбеди непречено продолжување на работата.

— реклама —

Во оставката навела дека очекува Управниот одбор, во рамките на своите законски овластувања, навремено да ги преземе потребните чекори за да се обезбеди континуитет во управувањето и примопредавањето на должноста да се спроведе во согласност со законот.

Грчиќ порачала и дека ќе ја обезбеди сета потребна помош во текот на процесот, за примопредавањето да помине уредно и без негативни последици врз функционирањето на РТС.

— реклама —

Нејзината одлука следуваше откако дел од вработените во РТС, како и кандидатите од студентската листа, побараа нејзино заминување. Меѓу барањата беа и заминувања на други членови на управата, како и на уредниците на Информативната програма.

— реклама —

Студентите во изминатите години предупредуваа дека јавниот сервис не известува објективно и непристрасно, туку ѝ оди во прилог на власта на Александар Вучиќ.

Тие го обвинуваа РТС дека го минимизира значењето на студентските протести, премолчува важни информации и не им дава доволно простор на критичарите на власта.

Особено им пречеше политичкото влијание врз уредувачката политика и поврзаноста на раководството на РТС со политичките центри на моќ.

Студентите бараат РТС да биде независен јавен сервис што на граѓаните ќе им обезбедува вистинити, целосни и навремени информации, наместо да служи на интересите на владејачката партија.