Горан Герасимовски објави дека е избран за потпретседател на СДСМ, заблагодарувајќи му се на претседателот на партијата Венко Филипче и на членовите за укажаната доверба.
Во своето обраќање, Герасимовски порача дека новата функција ја прифаќа со чувство на одговорност и дека политичката работа, според него, треба да се гради преку директен контакт со граѓаните.
Тој истакна дека доаѓа од локалната политика и дека искуството од секојдневните средби со граѓаните го научило дека политиката не се создава само од говорница, туку и „меѓу луѓето“.
Герасимовски повика на поголемо единство во СДСМ, нагласувајќи дека различните ставови не треба да бидат причина за поделби, туку простор за внатрешен дијалог. Според него, партијата треба повеќе да разговара со членовите, да ги слуша критиките и да биде присутна меѓу граѓаните.
Тој најави дека во новата улога ќе биде отворен за идеи и критики и порача дека искуството од Центар сака да го пренесе и во работата на партијата.
„Ве уверувам и Ви ветувам, дека победата во Центар, ќе ја пресликам и промовирам и во партијата“, порача Герасимовски.
Во обраќањето тој повика на надминување на поделбите и суетите во партијата, нагласувајќи дека секој член има свое место и придонес.
Герасимовски порача дека пред СДСМ претстои тежок период, но дека партијата, според него, најсилно дејствува кога се соочува со предизвици.
