Германците го менуваат начинот на патување: помалку летаат, повеќе патуваат со автомобил, а Хрватска е меѓу омилените

Германците во 2025 година патувале помалку во странство, но затоа рекорден број повеќедневни патувања реализирале во сопствената земја. Податоците на германскиот Сојузен завод за статистика покажуваат промена во навиките на патниците, со помалку авионски патувања и поголема употреба на автомобилите и железницата.

Вкупниот број повеќедневни патувања во земјата и странство минатата година изнесувал 274 милиони, што е пад од 1,1 отсто во споредба со 2024 година. Сепак, домашниот туризам достигнал историски максимум.

Бројот на повеќедневни патувања во Германија се зголемил за 3,9 отсто, достигнувајќи рекордни 169 милиони. Тоа е околу пет отсто повеќе отколку во годините пред пандемијата.

— реклама —

Спротивно на тоа, патувањата во странство бележат значителен пад. Во 2025 година Германците реализирале 105 милиони повеќедневни патувања во други земји, што е 8,3 отсто помалку од претходната година. Сепак, бројот на патувања во странство и натаму е за 5,4 отсто поголем од нивото пред пандемијата.

Според германските статистичари, зголемувањето на домашните патувања во голема мера се должи на службените патувања. Нивниот број пораснал за 10,5 отсто, на 41 милион, со што повторно го достигнал нивото од периодот пред пандемијата. Кај приватните туристички патувања во Германија, пак, е забележан пад од 2,9 отсто, на околу 233 милиони.

Германците воедно сè почесто избираат пократки патувања. Статистичарите забележале зголемување на бројот на кратки аранжмани, додека патувањата подолги од четири дена се намалиле.

— реклама —

Значајна промена е забележана и кај изборот на превозно средство. Во 2025 година Германците реализирале околу четири милиони авионски патувања помалку отколку една година претходно. Бројот на авионските патувања дури паднал и под нивото од периодот пред пандемијата.

Од друга страна, железничките патувања бележат благ пораст. Сепак, автомобилот останува убедливо најпопуларен избор за повеќедневните патувања. Во 2025 година со автомобил биле реализирани 60,2 отсто од сите патувања, додека железницата имала удел од 19,2 отсто, а авионскиот сообраќај 15,2 отсто. Туристичките автобуси учествувале со 2,7 отсто.

Кога станува збор за странските дестинации, Италија и натаму е најпопуларниот избор на германските патници. Во 12,4 отсто од сите повеќедневни патувања во странство, крајната дестинација била Италија. Следуваат Австрија со 11,1 отсто и Шпанија со 10,9 отсто. На листата се и Франција со 8,3 отсто и Холандија со 7,7 отсто.

— реклама —

Според германските статистичари, овие пет земји веќе една деценија се меѓу најпопуларните странски дестинации на германските туристи, со повремени промени во редоследот.

Хрватска, иако не е меѓу првите пет во официјалната листа на Сојузниот завод за статистика, и понатаму е меѓу омилените дестинации на Германците. Според податоците на Здружението на германската туристичка индустрија, Хрватска во 2025 година била шеста најпопуларна странска дестинација за германските туристи, со удел од 4,3 отсто.

Пред неа се Шпанија со 15 отсто, Турција со 7,8 отсто, Италија со 7,7 отсто, Грција со 5,6 отсто и Австрија со 4,4 отсто.

— реклама —

Интересен е и податокот за уделот на германските туристи во вкупниот број ноќевања во европските земји. Според податоците на Сојузниот завод за статистика и „Евростат“, Австрија и Хрватска се на самиот врв.

Во Австрија дури 35,9 отсто од сите туристички ноќевања во 2024 година биле реализирани од германски гости. Хрватска е на второто место, со 22,5 отсто од ноќевањата што им припаѓаат на туристи од Германија.

Уште поинтересен е фактот што во двете земји германските туристи оствариле повеќе ноќевања од домашните гости. Во Австрија домашните туристи учествувале со 28,3 отсто од вкупните ноќевања, додека во Хрватска домашните гости имале удел од само 9,3 отсто.