Германија бележи најсмртоносно лето: Околу 14.000 луѓе починале поради екстремните горештини

Германија годинава се соочува со најсмртоносното лето поврзано со екстремните горештини, со околу 14.000 смртни случаи поврзани со високите температури, покажуваат привремените проценки на Институтот „Роберт Кох“.

— реклама —

Податоците се однесуваат на периодот до 9 август, што значи дека летото сè уште не е завршено. Со оваа бројка Германија веќе го надминала претходниот рекорд од 2018 година, кога биле регистрирани околу 8.900 смртни случаи поврзани со топлотни бранови.

Најголем број жртви има меѓу лицата на возраст од 75 и повеќе години. Според Институтот „Роберт Кох“, дури 9.600 од проценетите 14.000 смртни случаи се случиле меѓу 22 и 28 јуни, период во кој температурите во одредени делови од Германија надминувале 41 степен Целзиусов.

— реклама —

Бројката е добиена преку статистичко моделирање, бидејќи високите температури најчесто не се наведуваат директно како причина за смрт во медицинската документација. Наместо тоа, жештината може да ги влоши постоечките кардиоваскуларни, белодробни или бубрежни заболувања и да доведе до смртен исход.

— реклама —

И други европски земји годинава бележат голем број смртни случаи поврзани со екстремните температури. Франција пријавила околу 7.300, а Шпанија околу 4.500 смртни случаи во периодите со високи температури.

Поранешниот германски министер за здравство Карл Лаутербах оцени дека официјалната бројка можеби е потценета, бидејќи Институтот „Роберт Кох“ користел релативно претпазлива методологија.

— реклама —

Лаутербах истакна и дека за ефикасна заштита од екстремните горештини се потребни значителни средства. Тој го поддржа предлогот за внесување на заштитата од климатските промени и прилагодувањето кон нив како заедничка задача на германските власти.