Германија ги исфрла кинеските дронови од употреба во својата војска

Германската војска повеќе нема да користи беспилотни летала произведени во Кина, соопшти Министерството за одбрана на Германија, во услови на зголемена загриженост кај западните армии дека ваквите системи би можеле да претставуваат безбедносен ризик и да пренесуваат чувствителни податоци кон Пекинг.

Досега кинеските беспилотни летала биле дозволени како поекономична опција за вежби и обука, но во иднина ќе бидат заменети со европски производи.

— реклама —

„За да ја зајакнеме самостојноста на Бундесверот и технолошкиот суверенитет, моделите произведени во Кина повеќе нема да се користат“, соопшти портпаролот на германското Министерство за одбрана.

— реклама —

Од Министерството појаснија дека не станува збор за општа забрана за користење системи од одредени држави, туку за одлука заснована врз индивидуални процени на ризикот, со цел заштита на воената безбедност, информациските системи и податоците.

Според германскиот неделник „Дер Шпигел“, кој прв ја објави информацијата, локалните воени команданти досега можеле да набавуваат беспилотни летала врз основа на стратегија од 2024 година. Таа содржела таканаречена „бела листа“ на одобрени системи, меѓу кои имало и неколку модели на кинеската компанија „ДЏИ“, најголемиот светски производител на беспилотни летала.

— реклама —

Од компанијата повеќепати ги отфрлиле сомнежите за безбедносен ризик, наведувајќи дека независна анализа не открила докази за пренос на податоци надвор од САД.

— реклама —

Загриженоста за кинеската технологија се одразува и во други земји. Минатиот месец САД забраниле користење возила на кинескиот производител „БИД“ во своја воздухопловна база на јапонскиот остров Окинава, додека Полска во февруари забранила пристап на возила произведени во Кина до воени објекти, поради сомневања дека нивните сензори би можеле да собираат чувствителни податоци.

Германското Министерство за одбрана дополнително нагласило дека нема општа забрана за возила од одредени држави или производители, но пристапот до чувствителни воени локации може да биде ограничен доколку вградените сензори се проценат како потенцијален безбедносен ризик.