Германија ги отвора вратите за нови приватни инвестиции

Германија се обидува да привлече нови домашни и странски инвестиции преку дводневен самит што денеска започна во Берлин, со учество на претставници на околу 200 големи компании, инвестициски банки и фондови.

— реклама —

На собирот учествуваат германскиот канцелар Фридрих Мерц, вицеканцеларот и министер за финансии Ларс Клингбајл, како и други членови на владата. Меѓу главните гости е најавен и Џенсен Хуанг, извршен директор на американската компанија за производство на чипови „Енвидија“.

Целта на самитот е да им се испрати порака на меѓународните инвеститори дека Германија е отворена за вложувања и да се поттикнат конкретни инвестициски договори. Владата како предности ги посочува стабилните јавни финансии, правната сигурност, развиениот истражувачки сектор, квалификуваната работна сила и пристапот до единствениот пазар на Европската Унија.

— реклама —

Сепак, инвестициите во Германија во последните години заостануваат зад оние во другите големи економии. Според анализата на „Алијанц“, вкупните инвестиции во земјата се намалиле за 6,4 отсто од 2019 до 2025 година, додека во останатиот дел од еврозоната пораснале за 6,7 отсто, а во САД за 20,2 отсто.

— реклама —

Како главни пречки за вложувањата се наведуваат високите трошоци за енергија, големото даночно оптоварување и прекумерната бирократија. Германската влада најавува реформи на социјалните системи и на пазарот на трудот, како и скратување на постапките за планирање и издавање дозволи, особено за изградба на центри за податоци.

Меѓу приоритетните области за инвестиции се вештачката интелигенција, енергетиката, полупроводниците, воената индустрија и сообраќајната инфраструктура. Владата очекува индустриската примена на вештачката интелигенција да ја зголеми продуктивноста и да овозможи нови деловни модели, а соработката со „Енвидија“ треба да придонесе за остварување на таа цел.

Во енергетиката, акцентот е ставен на проширување на електричната мрежа, додека во сообраќајот се планира забрзување на обновата и изградбата на инфраструктурата. Се разгледува и можноста државната компанија задолжена за автопатиштата самостојно да зема кредити за финансирање на инвестициите.