Германија ги заостри казните за употреба на дрога за силување – најмалку пет години затвор

Германскиот парламент денеска усвои закон со кој значително се заоструваат казните за употреба на таканаречените дроги за силување. Минималната затворска казна се зголемува од три на пет години кога овие супстанции се користат за подготовка на силување или разбојништво.

— реклама —

„Кој посегнува по дроги за силување, ги преминува сите граници на правната држава и заслужува затворска казна од најмалку пет години“, изјави пратеничката на владејачката Социјалдемократска партија на Германија, Соња Ајхведе, за време на расправата во Бундестагот.

— реклама —

Со новите законски измени, употребата на овие супстанции, чии жртви најчесто се млади жени, отсега ќе се третира како употреба на оружје.

Законот го поддржаа пратениците од сите партии, со исклучок на Алтернатива за Германија (АфД), од каде што сметаат дека построгите казни нема да ја зголемат безбедноста на жртвите.

— реклама —

Таканаречените дроги за силување се супстанции без мирис и боја, кои ја менуваат свеста на жртвата и им овозможуваат на сторителите полесно да манипулираат со неа.

— реклама —

Во Германија во 2023 година била регистрирана 171 жртва, но криминолозите сметаат дека вистинскиот број на случаи е значително поголем, бидејќи многу од нив остануваат неоткриени.