Германија и Турција планираат дополнително да ги зајакнат економските врски и соработката во енергетскиот сектор, порача германската министерка за економија Катарина Рајхе за време на посетата на Анкара.
Таа истакна дека Турција е важен трговски, енергетски и безбедносен партнер за Германија и нагласи дека двете земји имаат заеднички интерес за продлабочување на соработката.
„Потребна ни е Турција како сигурен трговски партнер, но и за остварување на заедничките политички цели“, изјави Рајхе на маргините на разговорите во турската престолнина.
Германската министерка се осврна и на актуелните геополитички случувања, вклучително и војната во Украина и конфликтот со Иран, изразувајќи надеж дека тензиите ќе бидат трајно надминати.
Освен како значаен сојузник во НАТО, Берлин ја гледа Турција и како важен партнер во напорите за диверзификација на снабдувањето со природен гас и електрична енергија. Ова прашање доби дополнителна важност по неодамнешните нарушувања на светските енергетски пазари.
Рајхе нагласи дека Германија и Турција се согласуваат дека е неопходно користење различни извори на енергија и поддршка на повеќе технолошки решенија во енергетскиот сектор.
Двете земји се договориле и за проширување на енергетското партнерство воспоставено во 2012 година, а нивните заеднички цели се дефинирани во посебен протокол.
„Да ги претвориме денешните предизвици во утрешни предности“, порача Рајхе, нагласувајќи ја потребата од заеднички пристап кон енергетската сигурност и економскиот развој.
