Германија одобри продажба на најголемиот европски трговец на мало со електроника на кинескиот гигант

Кинескиот гигант за електронска трговија JD.com доби условно одобрение од германското Министерство за економија за преземање на најголемиот европски трговец со електроника, MediaMarktSaturn.

— реклама —

Од германското министерство соопштија дека одобрението е условено со строга заштита на личните податоци на германските потрошувачи, како и со доделување широки надзорни и контролни овластувања на германската влада. Во случај на прекршување на условите, одобрението може да биде повлечено.

Во рамките на постапката, германските власти анализирале дали трансакцијата може да претставува ризик за јавниот поредок и националната безбедност.

— реклама —

Сепак, преземањето сè уште не е финализирано, бидејќи за промената на сопственоста е потребно и одобрение од Европската комисија. По првичната анализа, Комисијата изрази одредени сомнежи, наведувајќи дека JD.com можеби имал предност при доставувањето на понудата благодарение на кинеските државни субвенции.

— реклама —

Европската комисија спроведува детална истрага за да утврди дали аквизицијата би можела да ја наруши конкуренцијата на единствениот европски пазар, а конечната одлука треба да биде донесена најдоцна до 2 октомври.

JD.com ја поднесе понудата за преземање, вредна 2,2 милијарди евра, минатата година, а неколку месеци подоцна обезбеди мнозински удел во Ceconomy – матичната компанија на MediaMarktSaturn.

Преземањето претставува дел од пошироката стратегија на кинеските компании за проширување на европскиот пазар, во потрага по нови можности за раст надвор од домашниот пазар.