Германија остана без место во Советот за безбедност на ОН, Берлин ја обвинува Русија

Неуспехот на Германија да обезбеди место во Советот за безбедност на Обединетите нации предизвика реакции во Берлин, каде дел од одговорноста за исходот ја гледаат во геополитичките позиции на земјата и наводното руско влијание врз гласањето.

— реклама —

Германија не успеа да обезбеди нестално место во Советот за безбедност на Обединетите нации, откако во гласањето беше поразена од Австрија и Португалија.

Германскиот министер за надворешни работи, Јохан Вадефул, резултатот го оцени како „горчлив пораз“, посочувајќи дека зад исходот можеби стојат повеќе политички фактори.

— реклама —

Според него, меѓу можните причини се силната поддршка што Берлин ѝ ја дава на Украина во војната со Русија, како и јасната германска позиција во однос на Израел и конфликтот на Блискиот Исток. Вадефул тврди дека Русија активно лобирала против германската кандидатура, иако Москва не ги коментираше ваквите обвинувања.

— реклама —

На гласањето Германија добила 104 гласа, додека Португалија освоила 134, а Австрија 131 глас. Со тоа, двете земји обезбедија места во Советот за безбедност, заедно со Киргистан, Тринидад и Тобаго и Зимбабве.

Поразот се оценува како дипломатски неуспех и за германскиот канцелар Фридрих Мерц, кој во последниот период се соочува со зголемен политички притисок на домашен и меѓународен план.

— реклама —

Мерц им честиташе на избраните земји и порача дека Германија ќе продолжи активно да го поддржува мултилатералниот меѓународен поредок и работата на Обединетите нации.