Германија размислува да ја укине забраната за работа во недела за да ја поттикне економијата

Германската влада разгледува можност за ублажување на долгогодишните ограничувања за работа во недела, со цел да ја поттикне потрошувачката и да ѝ даде нов импулс на економијата, која веќе неколку години бележи слаб раст.

Според „The Wall Street Journal“, една од идеите е да им се овозможи на продавниците да работат и во недела, но предлогот предизвикува жестока дебата, бидејќи неделата во Германија со децении е законски заштитен ден за одмор.

— реклама —

Најголемата европска економија се соочува со сериозни предизвици. Економскиот раст практично е во застој од 2019 година, индустријата е под притисок од американските царини и сè посилната конкуренција од Кина, а бројни компании најавуваат отпуштања.

— реклама —

Владата на канцеларот Фридрих Мерц затоа бара мерки што би ја зголемиле потрошувачката. Меѓу нив е и можноста за либерализација на работата во недела.

Во Германија неделата е уставно заштитен ден за одмор уште од 1919 година, а оваа одредба е вградена и во актуелниот Устав. Законот од 1956 година предвидува продавниците во недела да можат да продаваат само ограничен број производи, како леб, пијалаци и други основни артикли.

— реклама —

За почеток, владата предлага ограничени измени, со кои општинските библиотеки би можеле да работат во недела, а пекарниците да имаат подолго работно време. Сепак, трговските здруженија бараат многу пошироки реформи и укинување на најголемиот дел од ограничувањата.

— реклама —

Поддржувачите на промените сметаат дека сегашните правила се застарени и не одговараат на современото општество. Тие посочуваат дека во недела е дозволено да работат многу професии, како лекари, угостители, новинари, полицајци и таксисти, додека вработените во продавниците во најголем дел немаат таква можност.

Противниците, меѓу кои се и синдикатите, предупредуваат дека укинувањето на забраната би можело дополнително да ги оптовари работниците и да го наруши правото на ден за одмор. Поради тоа, дебатата за работата во недела прерасна во едно од клучните економски и општествени прашања во Германија.