Германија стравува од недостиг на гас, планира формирање државни резерви

Германија планира формирање државни резерви на природен гас поради загриженоста за сигурноста на снабдувањето во текот на зимата. Новите резерви ќе се финансираат преку дополнителни надоместоци што ќе ги плаќаат потрошувачите, соопшти германското Министерство за економија.

— реклама —

Државните залихи треба да достигнат 24 терават-часови, што претставува околу 10 отсто од вкупниот капацитет на германските складишта. Нивното формирање е планирано во период од најмногу три години, а целта е да се обезбеди снабдување во случај на сериозни нарушувања на пазарот.

— реклама —

Според процените на Министерството, воведувањето на резервите би можело да ги зголеми цените на гасот за домаќинствата за 0,3 до 0,5 отсто. Трошоците за нивно формирање се проценуваат на 1,26 до 1,81 милијарда евра, без дополнителните трошоци за одржување.

Загриженоста доаѓа поради ниската пополнетост на германските складишта. На крајот на октомври тие биле исполнети 62 отсто, додека законскиот минимум за 1 ноември изнесувал 80 отсто. Според податоците на организацијата „Гас инфраструктур Јуроп“, на 10 ноември пополнетоста паднала на 58,5 отсто. Во истиот период, складиштата во Европската Унија биле исполнети 72 отсто.

— реклама —

Здружението на оператори на складишта за гас и водород „Инес“ предупреди дека германските резерви се на најниско ниво досега. Според нивните процени, доколку зимата биде исклучително студена, побарувачката би можела да ги надмине расположливите количества гас во првите три месеци од следната година.

— реклама —

Сепак, доколку температурите бидат вообичаени или повисоки, снабдувањето би требало да биде доволно. Од здружението нагласуваат дека полните складишта се клучни за сигурноста, особено во периоди на силен студ, кога увозот и капацитетите на терминалите за течен природен гас не можат самостојно да ја задоволат побарувачката.