Германската индустрија во текот на минатата година изгубила 177.000 работни места, покажуваат податоците на Федералната агенција за вработување, објавени во Нирнберг.
Според агенцијата, во декември 2025 година во производствениот сектор биле формално вработени околу 6,5 милиони луѓе, што претставува речиси една петтина од вкупната работна сила во Германија.
Вкупната вработеност во сите стопански гранки се намалила за 108.000 работни места, при што растот во останатите сектори не успеал да ги надомести загубите во индустријата, пренесува ДПА.
Најголем пад е забележан во автомобилската индустрија и нејзиниот синџир на снабдување, каде што биле изгубени околу 52.000 работни места. Во металната индустрија исчезнале уште 24.000 работни места, додека машинската индустрија останала без 28.000 вработени.
Според директорката на Федералната агенција за вработување, Андреа Налес, трендот на намалување на бројот на работници продолжува, а производствениот сектор во просек губи околу 15.000 работни места месечно.
Податоците покажуваат дека во 12-месечниот период, заклучно со крајот на јуни годинава, вкупниот број изгубени работни места достигнал 174.000.
