Германската министерка го обвини Путин за тероризирање на украинските цивили

Германската министерка за надворешни работи Аналена Баербок денеска го обвини рускиот претседател Владимир Путин за насочен терор врз цивилното население и инфраструктурата во Украина. „Фактот дека овој терор против инфраструктурата продолжува и по зимата покажува дека рускиот претседател сака да ја уништи земјата, тој сака да ги уништи животите на луѓето овде“, рече Баербок по посетата на една од најголемите електрани во Украина.

— реклама —

— реклама —

Украинскиот министер за енергетика Герман Галушченко ја информираше Баербок за состојбата на електраната, која минатиот месец беше цел на руски напад и беше уништена. Русија истрела 11 проектили кон електраната, од кои само шест беа соборени бидејќи, како што предупреди Галушченко, украинската воздушна одбрана нема соодветно оружје.

— реклама —

— реклама —

Тој ги информираше „меѓународните партнери дека на Украина и требаат повеќе системи за противвоздушна одбрана за да ги заштити не само големите градови, туку и инфраструктурата“. Баербок изјави дека е потребна поголема меѓународна поддршка за противвоздушната одбрана на земјата како резултат на руската офанзива и дека ситуацијата во Украина повторно драматично ескалира со масовните руски воздушни напади врз цивилната инфраструктура.