Германската железница излезе од минус – прв профит по седум години

Германската државна железничка компанија „Дојче бан“ соопшти дека во првата половина од 2026 година остварила нето добивка од 147 милиони евра, со што стави крај на седумгодишниот период на работење со загуби.

Во споредба со истиот период лани, кога компанијата забележа загуба од 760 милиони евра, финансискиот резултат е подобрен за повеќе од 900 милиони евра.

— реклама —

Приходите на компанијата се зголемиле за 1,8 проценти на годишно ниво и достигнале 13,6 милијарди евра, додека бројот на патници се искачил на околу 960 милиони.

— реклама —

Од „Дојче бан“ наведуваат дека подобриот резултат е постигнат благодарение на поуспешното работење во сите сектори, мерките за намалување на трошоците, како и кратењето на бројот на вработени во администрацијата и интерните служби.

Компанијата истакнува дека процесот на рационализација се одвива побрзо од планираното и дека веќе се реализирани околу 30 проценти од целите поставени до 2028 година.

— реклама —

Меѓуградскиот и далечинскиот железнички сообраќај остварил оперативна добивка од 148 милиони евра, наспроти загубата од 59 милиони евра во истиот период минатата година. Регионалниот сообраќај, пак, забележал оперативна добивка од 89 милиони евра, додека товарниот превоз останува единствениот сегмент со негативен резултат од еден милион евра.

— реклама —

Истовремено, нето-долгот на компанијата е зголемен за околу една милијарда евра и сега изнесува 21,6 милијарди евра, главно поради големите инвестиции во железничката инфраструктура.

Во првите шест месеци од годинава, германската влада и „Дојче бан“ инвестирале 8,7 милијарди евра во модернизација на железничката мрежа, што претставува најголема полугодишна инвестиција во историјата на компанијата.