Регионалниот суд во Бремен пресуди дека „Монделез“ ги прекршил правилата за конкуренција со новото пакување на чоколадите „Милка“, кое визуелно речиси не се разликува од старото, иако содржи помала количина производ.
Случајот беше покренат од агенција за заштита на потрошувачи од Хамбург, која тврдеше дека компанијата ги доведува потрошувачите во заблуда затоа што новото пакување од 90 грама изгледа речиси идентично со претходното од 100 грама.
Според наводите, новата чоколада е потенка само за еден милиметар, а дизајнот на амбалажата останал речиси непроменет, поради што потрошувачите тешко можат визуелно да ја забележат разликата.
Случајот се поврзува со поимот „шринкфлација“ – практика во која производителите ја намалуваат количината или тежината на производот, додека цената и изгледот на пакувањето остануваат речиси исти.
Од „Монделез“ ги отфрлија обвинувањата и соопштија дека тежината на производот е јасно наведена на амбалажата и дека компанијата постапувала транспарентно и согласно со прописите.
Сепак, еден од судиите во текот на постапката оценил дека спорното пакување е „релативно измамничко“, бидејќи потрошувачите не можат лесно да ја препознаат разликата само со гледање на производот.
Компанијата соопшти дека сериозно ќе ја разгледа пресудата и има можност да поднесе жалба.
