Двајца германски туристи се казнети откако со велосипеди влегле во забранета зона долж полско-руската граница во близина на градот Венгожево, на североистокот на Полска.
Според полската Гранична стража, мажот и жената биле снимени од безбедносните камери како го игнорираат сообраќајниот знак со кој е забрането движење во двете насоки, бидејќи сакале одблизу да ја видат надворешната граница на Европската Унија.
Поради прекршувањето, двајцата добиле казна од по 500 злоти (околу 117 евра). Дополнително, 63-годишниот маж бил казнет со уште 200 злоти (околу 47 евра), бидејќи ја фотографирал руската страна на границата.
Вкупната казна што ја платиле изнесува 1.200 злоти, односно околу 280 евра.
Од полската Гранична стража потсетуваат дека за неовластен влез во граничниот појас е предвидена казна до 500 злоти, а истата максимална казна важи и за фотографирање на територијата на соседната држава.
Венгожево се наоѓа во близина на границата со руската Калининградска област – силно милитаризирана руска енклава сместена меѓу Полска и Литванија.
