Германскиот индустриски гигант „Билфингер“ ќе укине 1.500 работни места ширум светот и ќе ја намали прогнозата за работењето во 2026 година, поради последиците од војната на Блискиот Исток.
Компанијата со седиште во Манхајм соопшти дека работењето во текот на летото значително заостанало зад очекувањата. Клиентите и во третото тримесечје биле воздржани со нови нарачки и со користењето на постојните рамковни договори.
„Билфингер“ планира да укине 1.500 од вкупно околу 31.000 работни места во светот. Мерката ќе ја чини компанијата околу 75 милиони евра, сума што ќе биде евидентирана како резервација во четвртото тримесечје.
Компанијата најави и програма за штедење наречена „Agile“, чија цел е организацијата да стане пофлексибилна и побрзо да реагира на промените на пазарот.
Главниот извршен директор Томас Шулц изјави дека компанијата сака да биде пофлексибилна и понезависна во одговорот на пазарните промени, вклучително и на последиците од долготрајниот конфликт на Блискиот Исток.
Според плановите, од 2028 година програмата треба да носи дополнителна годишна добивка од 75 милиони евра.
„Билфингер“ сега очекува приходите во 2026 година да бидат меѓу 5,3 и 5,7 милијарди евра, наместо претходно предвидените 5,4 до 5,9 милијарди евра.
Намалена е и прогнозата за оперативната маржа пред камати, даноци и амортизација. Наместо досегашните 5,8 отсто, сега се очекува да изнесува меѓу 3,2 и 3,6 отсто.
И покрај корекцијата на прогнозите за 2026 година, компанијата не ги менува среднорочните цели до 2030 година и понатаму очекува просечен годишен раст на приходите од осум до 10 отсто.
