Германскиот министер за одбрана Борис Писториус оцени дека неодамнешниот напад со руски дрон врз воз во близина на украинско-полската граница е дел од стратегијата на рускиот претседател Владимир Путин, чија цел е ширење страв низ Европа.
Писториус нагласи дека од клучно значење е да се остане присебен и да се избегнат провокации, но истовремено порача дека западните сојузници мора јасно да покажат подготвеност да ја бранат својата територија и да заземат цврст став во случај на натамошна ескалација.
Германскиот министер оцени дека Путин е целосно свесен за опасноста од своите потези.
„Она што Путин го прави е опасно. Тој го знае тоа и токму затоа го прави“, изјави Писториус, пренесува Ројтерс.
Инцидентот се случил во неделата, кога руски дрон погодил патнички воз во кој непосредно пред нападот се наоѓале претставници на Европската унија и поранешниот британски премиер Борис Џонсон.
