Германските власти открија скривалиште со оружје во шума во близина на Берлин

Германските безбедносни служби откриле скривалиште со оружје во шума во близина на Берлин, за кое се сомневаат дека било поврзано со руските разузнавачки служби, објавија јавните сервиси NDR и WDR.

— реклама —

Според проценките на германската Служба за заштита на уставниот поредок (BfV), оружјето можело да биде наменето за руски шпиони кои би добиле наредба од Москва за извршување напади во Германија.

Скривалиштето било професионално уредено и откриено откако германските власти добиле дојава. Во него биле пронајдени два пиштола. Безбедносните служби ги онеспособиле оружјата и поставиле GPS уреди, а потоа продолжиле да ја следат локацијата во надеж дека ќе откријат кој ќе дојде да ги преземе.

— реклама —

Сепак, никој не се појавил, поради што германските власти сметаат дека скривалиштето повеќе не е активно.

— реклама —

Случајот е поврзан со осомничен кој минатата есен бил уапсен во Романија. Германските безбедносни служби се сомневаат дека токму тој можеби го организирал скривалиштето.

Сојузното државно обвинителство од ноември го истражува случајот поради сомневање за подготовка на тешко кривично дело насочено против државата.

Ниту германските власти, ниту руската амбасада во Берлин досега не излегоа со официјален коментар за овие наводи.