Гинекологот Дејан Огненовиќ бил физички нападнат во својата ординација во поликлиниката „Букурешт“ во скопски Карпош, при што се здобил со скршеница на вториот вратен пршлен. За случајот докторот сведочеше за Сител, посочувајќи дека нападот следел по низа закани што, како што вели, ги добивал во изминатиот период.
Според сведоштвото на Огненовиќ за Сител, напаѓачот влегол во ординацијата додека тој прегледувал пациентки. Најпрво му упатил вербални закани, а потоа физички го нападнал.
Докторот за Сител изјавил дека смета оти нападот е поврзан со обид да биде отстранет од ординацијата, посочувајќи ја конкуренцијата како можна причина.
Неколку дена пред нападот, според неговите наводи, две жени облечени во бели медицински мантили со црна лента ги покриле камерите од видеонадзорот во ординацијата. Претходно, како што тврди, бил пресечен и интернет-кабелот.
Огненовиќ за Сител објаснува дека камерите биле поставени поради тоа што во неколку наврати исчезнувале медицински досиеја на пациенти.
Медицинската документација од ТОАРИЛУЦ покажала дека докторот се здобил со скршеница на вториот вратен пршлен. Во првите часови по нападот имал и потешкотии со вилицата и движењето на рацете.
Случајот бил пријавен во полиција на 16 септември. Огненовиќ за Сител вели дека оттогаш не добил информации за текот на постапката и стравува за својата безбедност, како и за безбедноста на своето семејство.
Сител објави дека СВР Скопје презема мерки за целосно расчистување и документирање на случајот. По завршувањето на постапката, до надлежното Јавно обвинителство ќе биде поднесена соодветна кривична пријава.
Гинеколошката ординација, според информациите, е под концесија на докторот Огненовиќ околу две и пол години, како и уште неколку ординации во истата поликлиника.
