Ѓоковиќ елиминиран уште на стартот во Шангај: „Не бев ни блиску до своето ниво“

Новак Ѓоковиќ го заврши настапот на мастерс-турнирот во Шангај уште по првиот натпревар, откако загуби од Полјакот Хуберт Хуркач со 6:4, 6:3. Српскиот тенисер призна дека не бил на вообичаеното ниво, посочувајќи го заморот и тешкотиите со приспособувањето на условите за игра.

По успешната недела во Пекинг, Ѓоковиќ не успеа да ја повтори истата игра во Шангај. Тој истакна дека се чувствувал поуморно и дека немал доволно свежина, додека Хуркач одиграл одлично на сервис.

— реклама —

„Не бев ни блиску до нивото на игра што го покажав во Пекинг. Малку сум поуморен и не сум свеж. Хуби сервираше многу добро, а јас не се чувствував како вообичаено на теренот, особено кога станува збор за чувството при ударите со топката“, изјави Ѓоковиќ.

Различните услови меѓу двата турнира во Кина дополнително му ја отежнале задачата. Според српскиот тенисер, подлогата во Шангај е значително побрза од онаа во Пекинг, што им остава малку простор за грешки на играчите при сервисот.

— реклама —

„Подлогата е исклучително брза и целосно поинаква од онаа во Пекинг. Ако еднаш во сетот го загубите сервисот, тоа може да биде доволно за да го загубите мечот. Токму тоа се случи. Многу е тешко да се враќа неговиот сервис, речиси невозможно – навистина сервираше одлично. Не успеав да се приспособам, а да се соочам со него уште во првиот меч тука беше навистина тежок ждреб“, рече Ѓоковиќ.

Со оваа победа, Хуркач за првпат го совлада Ѓоковиќ во нивниот деветти меѓусебен дуел.

— реклама —

И покрај раната елиминација во Шангај, српскиот тенисер е задоволен од настапот во Пекинг, каде што имаше успешна недела. Сега планира да се одмори и да се подготви за завршницата на сезоната, со посебен акцент на турнирите во сала.

„Да, Пекинг беше фантастичен. Тука испаднав многу рано, но тоа е во ред. Имав одлична недела во Пекинг и сега едвај чекам малку да се одморам и да се подготвам за турнирите во сала“, порача Ѓоковиќ.

Следниот голем предизвик за српскиот тенисер ќе биде мастерс-турнирот во Париз, кој започнува на 2 ноември. Ѓоковиќ најави дека ќе учествува на турнирот.