Новак Ѓоковиќ откри кога би можел да ја заврши својата богата тениска кариера, посочувајќи дека сака последниот голем настап да му биде на Олимписките игри во Лос Анџелес во 2028 година.
Во интервју за каталонскиот весник „Спорт“, српскиот тенисер зборуваше за документарецот „Волк во зима“, својата кариера и жртвите што ги направил за да стигне до врвот.
Ѓоковиќ зад себе има 24 гренд-слем титули, повеќе од 1.100 победи, олимписко злато и рекордни 428 недели на првото место на АТП-листата. Во документарецот неговата приказна е претставена преку симболиката на отпорноста и способноста да продолжи и кога околностите се против него.
„Во најтешките околности ја наоѓаш внатрешната сила и самодовербата што ти овозможуваат да продолжиш понатаму“, изјави Ѓоковиќ.
Тој призна дека патот до врвот барал големи одрекувања, особено во однос на времето поминато со семејството и пријателите.
„Секој пат подразбира жртви. Мораш да се откажеш од нешто за целосно да се посветиш на друга работа“, рече српскиот тенисер, додавајќи дека не жали поради одлуките што ги донел.
Посебно место во неговата кариера има олимпиското злато освоено во Париз во 2024 година. На 37-годишна возраст, по четири неуспешни обиди да стигне до олимпиското финале, Ѓоковиќ конечно ја освои единствената титула што му недостигаше, победувајќи го Карлос Алкараз во финалето.
„Тоа веројатно беше најважниот момент во мојот живот и кариера“, рече Ѓоковиќ.
Сега неговиот поглед е насочен кон Лос Анџелес и Олимписките игри во 2028 година. Иако е свесен дека неговата кариера се приближува кон завршницата, Ѓоковиќ верува дека може да стигне до уште еден олимписки настап.
„Би сакал да стигнам до Олимписките игри во Лос Анџелес во 2028 година. Мислам дека можам да го остварам тоа, но ќе видиме. Ќе зависи од тоа како ќе реагира моето тело и од многу други околности“, изјави тој.
Ѓоковиќ во последно време настапува на помал број турнири бидејќи сака да има повеќе време за семејството и за другите обврски во животот.
„Тенисот и понатаму е центарот на мојот професионален живот, но сакам да најдам рамнотежа. Се надевам дека ќе стигнам до Олимписките игри и на тој начин ќе ја завршам кариерата, со знамето на Србија на рамениците“, порача Ѓоковиќ.
На прашањето дали по гледањето на документарецот се кае за нешто, одговори кратко: „Не. Не се каам за ништо“.
„Не секогаш носев најпаметни одлуки, но сите тие искуства се дел од темелите врз кои се изградени мојот живот, карактерот и личноста што сум денес“, додаде тој.
