Ѓоковиќ пред голема одлука: Дали телото му кажува дека е доста?

Иднината на Новак Ѓоковиќ повторно е под знак прашалник по шокантниот пораз од Аргентинецот Маријано Навоне во првото коло на УС Опен. Како што оценува Би-Би-Си, овој пораз е поинаков од претходните, бидејќи овојпат сериозно се наметнува прашањето дали телото на српскиот тенисер сè уште може да го следи неговото огромно искуство.

Ѓоковиќ загуби по четири часа и 36 минути игра со 7:6, 5:7, 4:6, 6:2, 6:1. Во завршницата целосно физички падна, а во текот на мечот имал и грчеви и повраќање.

— реклама —

„Имав чувство како целото тело да ми се распаѓа“, призна Ѓоковиќ по мечот.

Во последните години тој успеваше физичките проблеми да ги надомести со искуство, тактика, движење и ментална сила. Овојпат тоа не беше доволно. Србинот призна дека воопшто не уживал на теренот, но им се заблагодари на навивачите за поддршката и им се извини што не успеал да го даде посакуваното.

— реклама —

Поразот има и историска тежина. Ѓоковиќ за првпат по јули 2018 година ќе испадне од најдобрите 10 тенисери во светот. Воедно, прекината е неговата неверојатна низа од 78 последователни победи во првото коло на гренд слем турнирите.

За првпат по 20 години тој го загуби воведниот меч на еден од четирите најголеми турнири, а на УС Опен заврши и неговиот совршен учинок од 37 победи во првите две кола.

— реклама —

Ѓоковиќ претходно најавуваше дека сака да игра до Олимписките игри во Лос Анџелес во 2028 година, а неодамна ги отфрли и шпекулациите за пензија.

Сепак, по случувањата во Њујорк, прашањето веќе не е само дали тој сака да продолжи, туку дали неговото тело ќе му дозволи.

Ѓоковиќ во мај следната година ќе наполни 40 години. Зад себе има речиси сè што може да се освои во тенисот, вклучително и олимписко злато, додека последниот гренд слем-трофеј го освои токму на УС Опен во 2023 година.

Досега секогаш успеваше да пронајде нов одговор. По тешкиот пораз во Њујорк, за првпат сериозно се поставува прашањето дали ќе успее да го направи тоа повторно.