Ѓоковиќ се расплака на теренот, па призна: „Не знам дали овој проблем може да се реши“

Новак Ѓоковиќ не успеа да го мине првото коло на УС Опен, откако во маратонски меч загуби од Аргентинецот Маријано Навоне со 7:6, 5:7, 4:6, 6:2, 6:1. За српскиот тенисер ова е прва елиминација во првото коло на гренд слем турнир по Австралија опен во 2006 година.

Мечот траеше четири часа и 36 минути, но резултатот остана во сенка на физичките проблеми со кои се соочуваше Ѓоковиќ. Во текот на средбата тој неколкупати повраќаше, имаше грчеви и болки, а во завршницата едвај се движеше по теренот. Во еден момент дури и заплака, но не сакаше да го предаде мечот.

— реклама —

По натпреварот, 39-годишниот Ѓоковиќ откри дека проблемите не се појавиле само во Њујорк, туку дека со слична состојба се соочува речиси во текот на целата година.

„Тоа е нешто со кое, за жал, се справувам речиси на секој меч оваа година. Гадење, повраќање, сериозен проблем. Потоа целото тело почнува да се распаѓа – грчеви, болки. На крајот попуштија грбот и рамото“, изјави Ѓоковиќ.

— реклама —

На прашањето дали проблемот може да се реши, Ѓоковиќ даде краток и загрижен одговор:

„Не знам. Се трудам, човеку, се трудам. Ќе видиме.“

— реклама —

Тој не сакаше да навлегува подлабоко во причините и во иднината, туку истакна дека во моментов се обидува да разбере што точно му се случува со телото и до каде може да продолжи да игра на овој начин.

„Не би навлегувал толку длабоко во моментов. Само се обидувам да сфатам што навистина се случува и колку далеку можам да одам на овој начин“, рече Ѓоковиќ.

Тој призна и дека во текот на мечот размислувал да се откаже, но откако го освоил вториот и третиот сет, решил да продолжи до крај.

Поразот од Навоне е историски за Ѓоковиќ. Тој никогаш претходно не бил елиминиран во првото коло на УС Опен, а последен пат на гренд слем турнир бил запрен во првото коло во 2006 година.