Новак Ѓоковиќ со доза хумор, но и искреност, зборуваше за претстојниот настап на Вимблдон, признавајќи дека со нетрпение го очекува преминот на тревната подлога, која е помалку физички исцрпувачка од земјените терени.
Српскиот тенисер, кој годинава го прослави својот 39. роденден, значително го намали бројот на настапи на земја. Сезоната ја започна во Рим, каде што беше елиминиран уште на стартот, а на Ролан Гарос стигна до третото коло, каде што по речиси петчасовна битка беше поразен од Бразилецот Жоао Фонсека.
По тој меч, Ѓоковиќ призна дека во завршницата почувствувал физички пад, што дополнително влијаело на неговата одлука внимателно да го темпира распоредот до крајот на кариерата.
Во пресрет на Вимблдон, тој одлучи да ги прескокне подготвителните АТП турнири на трева и слободното време го искористи за посета на трката во Формула 1 во Шпанија, каде што во разговор за „Скај Спортс“ даде интересен коментар.
„Со нетрпение го очекувам Вимблдон и преминот на тревата. Таму нема баш толку многу трчање како на земја“, рече Ѓоковиќ низ насмевка.
Иако изјавата беше во шеговит тон, таа јасно покажува дека српскиот ас внимателно ги дозира напорите. Последниве години редовно ги прескокнува турнирите пред Вимблдон, потпирајќи се на тренинзи и егзибициски натпревари.
Седумкратниот шампион на Вимблдон очигледно сака максимално подготвен и свеж да го дочека најпрестижниот тениски турнир, кој многумина го гледаат како негова најголема шанса за освојување на уште еден грен-слем трофеј.
