Новак Ѓоковиќ остро реагираше на одлуката на организаторите на Вимблдон да го затворат покривот на Централниот терен за време на четвртфиналниот меч против Феликс Оже-Алијасим.
По завршувањето на вториот сет, околу 19:40 часот, супервизорот одлучи натпреварот привремено да биде прекинат за да се затвори покривот, иако српскиот тенисер сметаше дека условите сè уште дозволуваат игра на отворено.
„Пред неколку дена не сакавте да го затворите покривот до 20:30 часот, а сега сакате уште во 19:40. Можевме да одиграме уште еден цел сет. Ова е турнир што се игра на отворено“, му порача Ѓоковиќ на супервизорот.
Кога организаторите го спомнале претстојниот меч на Јаник Синер, Ѓоковиќ возвратил:
„Не ми е гајле за мечот на Синер. Зборувам за нашиот натпревар. Каде е доследноста?“, рече тој.
Српскиот тенисер продолжи со критиките, обвинувајќи ги организаторите дека не ги применуваат правилата еднакво.
„Толку многу се гордеете со вашите правила, а не се придржувате до нив. Ни самите не знаете кое е правилото“, изјави Ѓоковиќ.
Неговиот став го поддржа и противникот Феликс Оже-Алијасим, кој исто така сметаше дека мечот треба да продолжи на отворен терен.
И покрај негодувањето на двајцата тенисери, организаторите останаа на својата одлука, па натпреварот продолжи дури откако покривот беше затворен. На крајот, Ѓоковиќ успеа да избори победа и пласман во полуфиналето на Вимблдон.
