Ѓорѓиевски и ОБСЕ им доделија признанија на професорите што ги поврзуваат младите преку заедничка настава

Градоначалникот на Скопје, Орце Ѓорѓиевски, заедно со шефот на Мисијата на ОБСЕ во Скопје, Килијан Вал, им додели признанија на професорите кои учествуваат во иницијативата за заеднички наставни часови во средните училишта.

Ѓорѓиевски истакна дека професорите имаат значајна улога во поврзувањето на младите, поттикнувањето меѓусебна почит и прифаќањето на различностите. Преку заедничката настава, учениците градат пријателства и учат да ги препознаваат различностите како вредност што ги зближува.

— реклама —

Признанија добија професорите и училишните тимови од осум средни училишта: „Браќа Миладиновци“, „Здравко Цветковски“, „Боро Петрушевски“, „Цветан Димов“, „Д-р Панче Караѓозов“, „Арсени Јовков“, „Димитар Влахов“ и гимназијата „Јосип Броз Тито“.

— реклама —

Иницијативата се спроведува од 2018 година, а Град Скопје веќе деветта година по ред го поддржува овој модел на заедничка настава во сите осум средни училишта под негова надлежност во кои наставата се одвива на различни наставни јазици.

Ѓорѓиевски посочи дека Скопје е единствената локална самоуправа во државата што континуирано го спроведува овој модел. Тој упати благодарност и до Мисијата на ОБСЕ во Скопје за долгогодишната соработка, стручната поддршка и обуките наменети за наставниците и училиштата.

— реклама —

Од Град Скопје најавуваат дека ќе продолжат да ги поддржуваат иницијативите што поттикнуваат доверба, почитување и заедништво меѓу младите.

— реклама —