Ѓорѓиевски: Јавното здравје не се штити со создавање страв и политички сензации

Градоначалникот на Скопје, Орце Ѓорѓиевски, реагираше на обвинувањата од СДСМ за справувањето со комарците и состојбата со западнонилската треска во Скопје, оценувајќи дека сериозна здравствена тема се претвора во дневнополитичка пресметка.

Ѓорѓиевски вели дека западнонилската треска не е нов вирус и дека случаи на локално пренесување се регистрирани и во повеќе европски земји, меѓу кои Грција, Србија и Косово. Според него, граѓаните треба да добиваат точни информации и превентивни мерки, а не да се создава паника.

— реклама —

Во однос на прскањето против комарци, тој ги спореди активностите во 2018 година со оние во 2026 година. Според Ѓорѓиевски, во 2018 година првата теренска дезинсекција започнала на 3 јули, а првото авионско прскање било реализирано на 7 и 8 јули. Оваа година, пак, активностите започнале уште на 7 мај.

Тој наведе дека досега биле реализирани повеќе авионски и теренски третмани против ларви и комарци, а дополнително се закажани нови третмани. Според него, активностите се спроведуваат согласно годишната програма, законските обврски, елаборатот на Центарот за јавно здравје – Скопје и препораките на Министерството за здравство.

— реклама —

— реклама —

„Јавното здравје не се штити со прес-конференции. Не се штити со создавање страв. Не се штити со политички сензации. Се штити со системска работа, континуирана превенција, стручни препораки и навремени активности на терен“, порача Ѓорѓиевски.

— реклама —

Градоначалникот најави дека Град Скопје ќе продолжи со третманите против комарци согласно стручните препораки и утврдената динамика, а јавноста, како што посочи, ќе биде навремено информирана за следните активности.

На крајот, Ѓорѓиевски го обвини СДСМ дека се обидува да ја користи состојбата за дневнополитички цели, додавајќи дека здравјето на скопјани е премногу сериозна тема за да биде средство за политички поени.