Градоначалникот на Скопје, Орце Ѓорѓиевски, соопшти дека успешно е завршена тендерската постапка и јавното наддавање за набавка на 100 нови еколошки автобуси за градот.
Според неговата објава на социјалните мрежи, информацијата ја добил во телефонски разговор со министерот за транспорт Александар Николоски.
Ѓорѓиевски изрази благодарност до премиерот Христијан Мицкоски и до министерот Николоски за, како што наведе, силната поддршка за реализација на проектот.
Тој истакна дека набавката претставува значаен чекор кон обновување на возниот парк на ЈСП „Скопје“ и создавање помодерен, почист и побезбеден јавен превоз за граѓаните.
Според Ѓорѓиевски, за најповолен понудувач е избрана компанијата „Икарус“, во соработка со ЕВН Македонија.
Во објавата се наведува дека од денес почнува десетдневниот рок за жалби, по што ќе следуваат потпишувањето на договорот и почетокот на процесот за испорака на автобусите.
