Запуштената зелена површина на плоштадот „Македонија“, која со години граѓаните ја нарекуваат „ливада“, се уредува и треба да добие нов и поуреден изглед.
Градоначалникот на Град Скопје, Орце Ѓорѓиевски, објави дека во тек е целосно хортикултурно уредување на просторот и поставување ново зеленило, со цел површината да прерасне во зелена оаза што ќе се вклопува во изгледот на централниот градски плоштад.
Паралелно се обновува и плочникот кај Порта „Македонија“, каде што веќе се заменети значително оштетените подни плочки. Обновувањето на преостанатите оштетени делови треба да продолжи следната недела.
Во тек се и активности за обновување на подната фонтана.
Ѓорѓиевски посочува дека со овие активности целиот простор треба повторно да стане уредна, современа и привлечна целина, како едно од препознатливите места во центарот на Скопје.
