„Го добив тоа што ми требаше“: Зеленски за писмото испратено до Путин

Украинскиот претседател Володимир Зеленски изјави дека писмото што му го испратил на рускиот претседател Владимир Путин го дало резултатот на кој се надевал, иако не откри за што конкретно станува збор.

— реклама —

Говорејќи на заедничка прес-конференција со лидерите на нордиските и балтичките земји во Талин, Зеленски рече дека во изминатиот месец испратил повеќе писма до различни институции и држави, со различни цели.

„Во последниот месец испратив повеќе писма со различни цели – до Европската Унија, САД, Белата куќа, Конгресот, па и до Путин. Имав цел кога му го испратив писмото на Путин... и мислам дека го постигнав резултатот што ми беше потребен“, изјави Зеленски.

— реклама —

Тој додаде дека не може да ги сподели сите детали, но посочи дека Украина има голема потреба од противбалистички ракети и дека успеал да обезбеди резултат и на тој план.

— реклама —

На крајот на мај, Зеленски испрати писмо до американскиот претседател Доналд Трамп, предупредувајќи за недостиг од системи за противвоздушна одбрана во Украина, особено за пресретнување балистички ракети.

Во отвореното писмо објавено на 4 јуни, украинскиот претседател му предложи на Путин да договорат датум за директна средба на која би се разговарало за завршување на војната. Истовремено, тој побара и Европа и САД да бидат вклучени во мировните преговори меѓу Киев и Москва.

— реклама —

Путин подоцна изјави дека го прочитал писмото, но дека „не гледа смисла“ во одржување средба, додека Зеленски објасни дека јавното обраќање имало цел да предизвика реакција од Кремљ, бидејќи Украина има ограничени можности директно да испраќа пораки до Русија.