Двајцата обвинети за грабнување на 21-годишно момче од Неготино признале вина пред Кривичниот совет при Основниот суд Кавадарци, кој им изрече вкупно 10 години затвор.
Б. М. (37) е осуден на шест години затвор, додека Ќ. С. (30) доби четиригодишна затворска казна. На двајцата им е продолжен притворот до правосилноста на пресудата.
Пресудата е првостепена, што значи дека странките имаат право на жалба до Апелацискиот суд. Од Основното јавно обвинителство Кавадарци веќе најавија дека ќе поднесат жалба.
Обвинетите, кои се жители на селото Копришница во Демир Капија, пред судот изразиле каење и жалење за стореното.
Според психијатриското вештачење, првообвинетиот Б. М. во времето на извршувањето на делото бил во состојба на битно намалена пресметливост поради трајна душевна болест, односно хронична психоза, параноја и патолошка љубомора.
Грабнувањето се случило на 12 април годинава. Според обвинението, Б. М. како поттикнувач на делото, заедно со Ќ. С., го грабнале 21-годишното момче од Неготино со намера да го присилат да сними изјава во која ќе признае дека ја силувал сопругата на првообвинетиот.
При грабнувањето, Ќ. С. употребил и пиштол, кој го репетирал и со него му се заканувал на момчето.
Двајцата го внеле момчето во „мерцедес“ од дворот на неговиот дом во Неготино и тргнале по стариот пат кон Демир Капија. Според обвинението, во текот на патувањето му се заканувале дека ќе го убијат и го удирале со тупаници.
Мобилниот телефон му бил фрлен, а на главата му ставиле црни кеси за да не може да види каде го носат. Откако стигнале во шумски предел, го извадиле од возилото и го принудувале да слуша аудиоснимки и да признае дека тој е лицето што се слуша на снимката.
Бидејќи момчето постојано негирало, двајцата му се заканувале со силување и убиство и продолжиле да го тепаат со тупаници и пластична цевка. Притоа му нанеле тешки телесни повреди.
Сторителите биле откриени откако момчето, пред да му го одземат и фрлат телефонот, успеало да испрати порака за помош до полицијата. Неговото насилно внесување во возилото го забележале и соседите.
Полицијата потоа ги идентификувала осомничените и стапила во контакт со нив. Откако дознале дека се откриени, тие го однеле момчето во полициската станица во Неготино.
