Го намамиле, претепале и ограбиле, па го терале да земе брз кредит – драма во Куманово

Шеесет и четиригодишен маж од Куманово бил измамен, физички нападнат и ограбен, а потоа двајца сограѓани се обиделе да го принудат да подигне брз кредит од финансиско друштво. Мажот успеал да ѝ сигнализира на вработената дека дејствува под присила, по што таа повикала полиција.

— реклама —

Според информациите од Министерството за внатрешни работи, на 22 октомври полициски службеници од СВР Куманово ги лишиле од слобода С.Б. (45) и Р.Т. (52), двајцата од Куманово.

— реклама —

Како што било пријавено, жената го намамила 64-годишниот маж во својот дом, барајќи од него да ѝ помогне при купување мобилен телефон. Меѓутоа, кога пристигнале во дворот, Р.Т. физички го нападнал, додека С.Б. му ги одзела парите и мобилниот телефон.

По нападот, според пријавата, двајцата го принудиле мажот да отиде во финансиско друштво за да подигне брз кредит.

— реклама —

Додека бил во финансиското друштво, оштетениот успеал да ѝ даде знак на вработената дека не бара кредит по сопствена волја, туку под присила. Таа веднаш ја известила полицијата.

Осомничените биле приведени во полициска станица, а од МВР информираат дека по целосното документирање на случајот против нив ќе биде поднесена соодветна пријава.