Актерот Саше Тасевски се присети како било Скопје пред земјотресот, но и какво е сега. Еве што напиша Тасевски на социјалната мрежа фејсбук.
„Кое Скопје? Го нема Скопје одамна, зашто Скопје било скопјаните, дружењата во дворови и маала, солидарноста, одењето на утакмици на Вардар и Работнички секоја недела, фудбал и серва пред зграда, џамлии на сликици, гитари на секоја клупа до пет сабајле, ќебапите во Кермес и Езерце, одењето со мама и тато на езеро Треска, на Матка, зеленило и паркови на секој чекор, простор што дише.
Гледате нешто од тоа?
Го нема.
Е па го нема ни Скопје.
Знам, еуфорија, сентименталност, сеќавања на оние кои биле деца кога го преживеале земјотресот, ама вие кои сте родени по него изгледа потешко сте го преживеале, таков ви е галиба осечајот.
Да не се повтори?
Жалам ама ќе се повтори. Кога тогаш. Кога се силува природата и еден град со децении, казната мора да стигне во некоја форма. Закон на природата и богот на одмаздата. Ние божем скопјани, а мирно гледавме со години како Скопје ни го силуваат разни копита и уште гледаме и ќутиме. Али не е лошо да поцмиздриме секој 26 јули.
Јас лично Скопје веќе не го доживувам како град во кој сум се родил и пораснал. Ова не е градот од моето детство и младоста. Ова Скопје е од најлошиот паралелен универзум“, напиша Тасевски на ФБ.