67-годишна жена од кочанско пријавила дека била ограбена и нападната во центарот на Скопје, соопшти Министерството за внатрешни работи.
Според пријавеното, на 9 август околу 7:30 часот, две лица ѝ се доближиле, по што едното со употреба на физичка сила ѝ го одзело женскиот ранец во кој имало документи и лични предмети. Двете лица потоа избегале.
Жената тргнала по нив и влегла во автобус, во обид да си го врати ранецот. Тогаш, според нејзината пријава, истото лице ја удрило со тврд предмет, по што напаѓачите повторно избегале.
Во СВР Скопје случајот бил пријавен во 14:40 часот. Полицијата презема мерки за расчистување на случајот.
