Турската репрезентација го доживеа и вториот пораз на Светското првенство, откако загуби од Парагвај со 1-0 и остана без шанси за пласман во нокаут-фазата.
Решавачкиот момент на натпреварот се случи уште во првата минута, кога Галарза по само 64 секунди игра со одличен удар од далечина ја затресе мрежата за водство на Парагвај.
По раниот гол, Парагвај се повлече и се ориентираше кон одбрана на предноста. Во судиското продолжение од првото полувреме дополнително се соочи со проблеми, откако Алмирон заработи црвен картон поради прекршување на новото правило поврзано со прикривање на устата.
И покрај тоа што целото второ полувреме го одигра со фудбалер помалку, парагвајската селекција успеа да го издржи силниот притисок на Турција.
Статистиката целосно беше на страната на Турците, кои имаа 78 проценти посед на топката и дури 32 удари кон голот, но само пет од нив беа во рамките на голот.
По две одиграни кола, на врвот во групата се наоѓаат САД со шест бодови, Австралија и Парагвај имаат по три, додека Турција останува без освоен бод.
Со овој пораз, Турција стана првата репрезентација која и математички е елиминирана од Светското првенство уште во групната фаза.
