Голем пожар кај Бигла, околу 300 луѓе се на терен

Големиот пожар во атарот на делчевското село Бигла во текот на денот неколкупати бил локализиран, но силниот ветер и високите температури повторно го активирале и овозможиле негово ширење.

На терен биле ангажирани околу 300 луѓе, а во гаснењето учествувале противпожарни единици од Штип, Гевгелија, Берово, Пехчево, Македонска Каменица, Кочани и Виница, како и припадници на МВР, Црвениот крст, здравствените служби и други институции.

— реклама —

Градоначалникот на Делчево и претседател на општинскиот кризен штаб, Иван Гоцевски, изјави дека пожарот бил пријавен околу 14 часот и дека во текот на денот биле преземени голем број активности за негово ставање под контрола.

„За жал, неколку пати во текот на денот истиот пожар беше локализиран, но поради високите температури и силниот ветер се шири и се проширува на повеќе територии на село Бигла“, рече Гоцевски.

— реклама —

Тој упати благодарност до сите екипи и институции кои биле вклучени во интервенцијата, нагласувајќи дека ситуацијата била особено сериозна поради густата борова шума.

„Тука станува збор за многу густа борова шума која може да отиде до териториите на повеќе општини кои се тука во регионот“, истакна градоначалникот.

Во текот на денот биле загрозени повеќе маала во селото, но со брзите интервенции било спречено огнот да стигне до куќите. Според Гоцевски, засега нема загрозени човечки животи.

— реклама —

„Имавме ситуација во која повеќе маала беа загрозени, но благодарение на брзите интервенции успеавме да ги ставиме под контрола. Засега немаме човечко загрозување“, изјави тој.

Неколку лица кои учествувале во гаснењето имале полесни проблеми поради вдишување чад. Според информациите од терен, тие се во добра здравствена состојба.

— реклама —

Жителите од околните маала биле предупредени да бидат подготвени за евакуација доколку тоа стане неопходно. Одреден број туристи кои престојувале во вили во близина на пожарот веќе биле преместени на безбедна локација.

Во гаснењето биле ангажирани и „ер-трактори“, а Гоцевски посочи дека помошта од институциите и соседните општини била од големо значење за спречување на понатамошното ширење на огнот.