Голем шумски пожар што избувна во близина на Зона 51, тајниот воен објект на американските воздухопловни сили во Невада, продолжува брзо да се шири. Според американското Биро за управување со земјиштето (BLM), досега под контрола се ставени само седум проценти од пожарот.
Пожарот, наречен „Quail Springs Fire“, избувнал по удар од гром и гори речиси една седмица. До овој момент зафатил површина поголема од 54 квадратни километри, а неговото ширење го поттикнуваат високите температури, сувите ветрови и тешко пристапниот терен.
Во регионот е издадено предупредување за екстремно високи температури кое ќе биде во сила најмалку до недела, додека во наредните денови не се очекуваат врнежи.
Од BLM соопштија дека пожарот засега не претставува директна опасност за домовите и јавните објекти, но жителите на малото место Рејчел се предупредени поради чадот. Огнената стихија се шири во рамките на воената област „Nevada Test and Training Range“, која е затворена за јавноста.
Овој воен комплекс се наоѓа во близина на Зона 51, база основана за време на Студената војна за тестирање и развој на воени воздухоплови. Активностите што денес се одвиваат во базата остануваат строго доверливи, а пристапот е забранет и обезбеден со предупредувачки знаци, електронски надзор и вооружено обезбедување.
Таинственоста околу Зона 51 со децении е причина за бројни теории на заговор, меѓу кои и онаа дека во базата се чуваат вонземјани и нивни летала. Американските власти континуирано ги отфрлаат ваквите тврдења.
