Големиот пожар кај Чичево изгаснат по 13 часа борба со огнот, спасени куќи, лозја и овоштарници

По повеќе од 13 часа непрекината борба со огнената стихија, големиот пожар што вчера избувна кај Долно Чичево во Општина Градско е целосно изгаснат доцна синоќа, околу 22:20 часот.

— реклама —

Во гаснењето учествувале екипи на Територијалната противпожарна единица Велес, со помош од нивните колеги од ТППЕ Кавадарци и Неготино. На терен биле ангажирани и пет доброволци од Доброволното противпожарно друштво од Неготино, четири огнени тимови со возила „пинцгауер“ од Дирекцијата за заштита и спасување, како и три ер трактори и хеликоптер на МВР.

Благодарение на брзата и координирана интервенција, огнот не успеал да стигне до куќите во Долно и Горно Чичево. Спасени се и овоштарниците и лозовите насади во атарите на двете села, кои се наоѓаат во реонот на Клепа.

— реклама —

Пожарот бил пријавен околу 9 часот наутро кај Долно Чичево, по што брзо почнал да се шири кон Горно Чичево. Ситуацијата дополнително се усложнила откако огнот излегол од контрола и продолжил кон околните ридови, при што огнената линија достигнала должина од околу 10 километри.

— реклама —

Директорот на Дирекцијата за заштита и спасување, Стојанче Ангелов, доцна синоќа од теренот оцени дека командирот на ТППЕ Велес, Димче Јованов, одиграл клучна улога во справувањето со пожарот, нарекувајќи го вистински херој.

Јованов информираше дека пожарникарите се соочиле со исклучително тежок и непристапен терен, но со помош на екипите од Кавадарци и Неготино, доброволците, ДЗС и МВР успеале целосно да го ликвидираат пожарот. По гаснењето било извршено и согледување на опожарениот терен, при што пожарникарите го изгаснале и последното жариште.

— реклама —

Од ТППЕ Велес најавија дека екипа и денеска повторно ќе излезе на терен за дополнителна контрола и навремено откривање на евентуални повторни активирања на огнот.