Податоците на патници, вработени и деловни партнери на пропаднатата американска авиокомпанија Spirit Airlines наскоро би можеле да се користат за тренирање на модели за вештачка интелигенција на Google. Технолошкиот гигант се договорил да плати 10 милиони долари за дел од интерната документација на Spirit, која во мај престана со работа и сега во стечај ја распродава својата имотна и деловна актива.
Пакетот што Google сака да го купи содржи електронска пошта и интерна комуникација, табели, трансакции со клиенти, податоци за резервации и програмата за лојалност, како и информации од секторот за човечки ресурси.
Според судската документација, од податоците се отстранети сите информации што би можеле да го откријат идентитетот на поединци. Од Google потврдиле дека компанијата купува дел од корпоративните податоци на Spirit со цел да ги подобри своите производи и модели за вештачка интелигенција, нагласувајќи дека во рамките на договорот нема да добие лични податоци.
За податоците се натпреварувала и компанијата за вештачка интелигенција Mercor.io, која понудила 7,5 милиони долари. Конечната одлука за продажбата треба да ја донесе стечајниот судија Шон Лејн на рочиште закажано за среда.
Ваквата продажба е невообичаена во стечајната постапка на авиокомпанија. Вообичаено, пропаднатите превозници ги презема друга авиокомпанија, која ги наследува и податоците и ги интегрира во своето работење.
Spirit, сепак, е првата поголема американска авиокомпанија во последните 25 години што целосно се ликвидира, наместо да биде преземена од конкурент. Токму поради тоа, нејзините корпоративни податоци сега се појавуваат како значајна ставка во стечајната распродажба.
