Бројот на инсталации на пребарувачот DuckDuckGo пораснал за 30 проценти откако корисниците почнале да се бунат против, како што велат, „насилното наметнување“ на AI Search од страна на Google.
Минатата недела, по најавата на „Гугл“ за голема реконструкција на својот пребарувач, многумина на социјалните мрежи почнаа да пишуваат дека преминуваат на DuckDuckGo бидејќи таму може да се исклучи користењето на вештачка интелигенција.
„Гугл едноставно повеќе не е Гугл“, гласи еден од најсподелуваните коментари.
На годишната конференција за програмери Google I/O, компанијата соопшти дека традиционалната листа со сини линкови ќе биде заменета со AI агент кој ќе одговара на прашања, ќе извршува задачи и ќе активира системи во позадина.
Реакциите во јавноста биле остри. Дел од корисниците предупредуваат дека тоа може да го уништи отворениот интернет, додека други сметаат дека AI-прегледите често даваат неточни одговори и им ја одземаат контролата на луѓето кои воопшто не сакаат да користат вештачка интелигенција.
Како реакција на овие промени, многумина почнале да преминуваат на DuckDuckGo, пребарувач ориентиран кон приватноста, кој досега не успеваше сериозно да ја загрози доминацијата на Google.
За време на антимонополското судење против Google во 2023 година, извршниот директор на DuckDuckGo, Габриел Вајнберг, сведочел дека ексклузивните договори на Google за стандарден пребарувач ѝ наштетиле на можноста неговата компанија да стане главен избор на корисниците.
„Google насилно турка вештачка интелигенција без никаква можност таа да се исклучи“, изјавил Вајнберг.
„Како резултат на тоа, нивните резултати стануваат сè полоши, а не подобри. Ние сакаме да бидеме место каде контролата останува кај корисниците и каде тие сами одлучуваат колку малку или колку многу вештачка интелигенција сакаат“, додал тој.
DuckDuckGo нуди и функција „Search Assist“, слична на AI-прегледите на Google, како и „AI Image Filter“, кој ги отстранува сликите создадени со вештачка интелигенција од резултатите при пребарување.
Директорот за комуникации и политика во DuckDuckGo, Камил Базбаз, изјавил дека токму овие AI функции се меѓу најпопуларните во компанијата.
„Луѓето едноставно сакаат право на избор“, заклучил Базбаз.
