Google воведува нови промени во Google Play Store кои би можеле дополнително да го отежнат откажувањето на претплати за корисниците.
Досега Google Play нудеше едноставна страница за управување со претплати, преку која корисниците лесно можеа да ги откажат сервисите што повеќе не сакаат да ги плаќаат. Но, компанијата сега им овозможува на развивачите дополнителни алатки за да ги задржат претплатниците.
На годинешната конференција Google I/O, технолошкиот гигант најави дека развивачите наскоро ќе можат да им понудат на корисниците префрлување на поевтин пакет наместо целосно откажување на претплатата.
Кога корисник ќе започне процес на откажување во Play Store, покрај стандардните опции за прекин или останување, ќе се појавуваат и понуди за поевтини претплатнички планови.
Google објаснува дека новиот API за управување со претплати ќе овозможи лесно менување на пакет директно во апликацијата. Најважниот дел за развивачите е што оваа функција ќе биде интегрирана токму во процесот на откажување – во моментот кога корисникот ќе се обиде да ја прекине претплатата, системот автоматски ќе понуди поевтина варијанта.
Според првичните информации, процесот на откажување нема драстично да се комплицира, но корисниците веројатно ќе треба дополнително да скролаат и да поминат низ уште неколку чекори пред конечно да ја потврдат одлуката.
Google истовремено најави и други новитети за Play Store, меѓу кои интеграција на препораки за апликации преку AI асистентот Gemini, како и проширување на паметното пребарување преку функцијата „Ask Play“.
