По прогласувањето на епидемијата во Гостивар, Општината го активираше Кризниот штаб, кој ќе биде задолжен за координација на активностите со сите надлежни институции во справувањето со здравствената состојба во градот, соопшти денеска градоначалникот Валбон Лимани.
На прес-конференција, Лимани изјави дека Кризниот штаб е формиран на негова иницијатива и дека во него ќе бидат вклучени сите институции кои имаат надлежност во управувањето со кризата.
„На мој предлог го активиравме Кризниот штаб по прогласувањето на епидемијата, кој ќе биде составен од сите релевантни институции и ќе соработуваме со единствена цел – што полесно да се надмине создадената ситуација во нашиот град“, рече Лимани.
Тој најави дека ќе биде свикана и вонредна седница на Советот на Општина Гостивар, на која советниците ќе расправаат за актуелната состојба и ќе донесуваат одлуки за дополнителна помош и поддршка на граѓаните погодени од епидемијата.
Како дел од мерките, Општината ќе отвори и телефонска линија за граѓаните кои не се во можност сами да обезбедат вода и други неопходни намирници.
„Ќе објавиме и контакт број 071 839 300, на кој нашите граѓани кои немаат можност да излегуваат ќе можат да се јават, а мобилните тимови ќе им доставуваат вода и други неопходни работи, со единствена цел да им го олесниме секојдневното функционирање во овие денови“, изјави градоначалникот.
Лимани посочи дека Општината е во постојана комуникација со сите надлежни институции и дека ќе даде целосна поддршка во утврдувањето на причините за епидемијата.
„Отворени сме за соработка со сите релевантни институции со цел да се утврди вистината за овој случај“, нагласи тој.
Во своето обраќање, градоначалникот упати апел до граѓаните да ги почитуваат препораките на здравствените власти, а воедно им се заблагодари на компаниите, институциите и сите кои се вклучија во обезбедувањето помош за жителите на Гостивар.
„Оваа ситуација треба да нè обедини сите гостиварци и не смее да се злоупотребува, туку сите заедно да ја надминеме што е можно полесно и побрзо“, порача Лимани.
