И покрај забрзаниот развој на мобилните и дигиталните начини на плаќање, готовината и натаму е најшироко прифатена форма на плаќање на физичките продажни места во еврозоната, покажува истражување на Европската централна банка.
Според податоците, готовина прифаќаат 92 отсто од компаниите што продаваат стоки и услуги на физички локации, што е зголемување од 90 отсто во 2024 година. Од ЕЦБ оценуваат дека со тоа е прекинат трендот на намалување на прифаќањето готовина што беше забележан за време и по пандемијата.
Платежните картички ги прифаќаат 88 отсто од компаниите, што е речиси исто како пред две години. Најзначителен раст бележат мобилните плаќања – нивната прифатеност се зголемила од 36 на 68 отсто.
Готовината е најзастапена во трговијата, рестораните и хотелите, каде што ја прифаќаат 93 отсто од анкетираните компании. Најниска е застапеноста во секторот на уметноста, забавата и рекреацијата, со 84 отсто.
Највисока стапка на прифаќање готовина меѓу земјите од еврозоната имаат Грција и Италија, со по 99 отсто. На спротивниот крај се Белгија со 81 отсто и Кипар со 76 отсто.
Од компаниите што веќе прифаќаат готовина, 92 отсто очекуваат да продолжат со оваа практика и во следните пет години. Како главни предности на готовината ги посочуваат приватноста и сигурноста, додека меѓу недостатоците ги наведуваат можноста за грешки при враќање кусур, безбедносните ризици и потенцијалните внатрешни измами.
Истражувањето опфатило 8.205 компании од сите 21 земја во еврозоната, а било спроведено во периодот од февруари до април 2026 година.
