Градежниот факултет ќе ги проценува ризиците од свлечишта и нестабилност на падините кај Барутана на Водно

Градоначалникот на Општина Центар, Горан Герасимовски, нема да го предложи нацрт-ДУП-от „Барутана“ на усвојување пред Советот сè додека не се утврди законско и прифатливо решение за сите отворени прашања, особено за стабилноста на теренот и пристапната сообраќајница.

На денешниот брифинг со новинарите, Герасимовски истакна дека безбедноста на граѓаните мора да биде приоритет и дека исполнувањето на формалните процедури не е доволно доколку постојат сомнежи за безбедноста на планските решенија.

— реклама —

Тој информираше дека Дирекцијата за заштита и спасување дала позитивно мислење за нацрт-планот, потврдувајќи дека условите од областа на заштитата и спасувањето се соодветно вградени во документацијата.

— реклама —

Позитивни мислења и оценки доставиле и Комисијата за урбанизам на Град Скопје, Агенцијата за катастар на недвижности, ЈП „Водовод и канализација“, надлежни сектори при Министерството за животна средина и просторно планирање, Агенцијата за електронски комуникации, ЕСМ-Топлификација, Агенцијата за цивилно воздухопловство, Управата за заштита на културното наследство, АД „Водостопанство“ и Министерството за внатрешни работи.

Сепак, градоначалникот нагласи дека позитивните мислења не значат дека планот автоматски ќе биде усвоен или дека постапката е завршена.

— реклама —

За дополнително да се утврди безбедноста на подрачјето, Општината ќе ѝ наложи на планерската куќа да нарача посебна студија од Градежниот факултет. Со неа треба да се проценат ризиците од ерозија, свлечишта и нестабилност на падините.

Герасимовски појасни дека Општината има законска обврска да ја води постапката за нацрт-ДУП-от „Барутана“, но тоа не значи дека планот мора да биде усвоен по секоја цена.

Тој најави дека ќе бидат разгледани сите забелешки и ќе се спроведат потребните дополнителни анализи, а додека не се разрешат спорните прашања, планот нема да биде ставен на дневен ред на Советот.