Новоизбраниот градоначалник на Скадар, Валдрин Пјетри поднесе оставка од таа функција поради обвинувањето на албанската полиција дека во Италија бил осуден за шверц на дрога.
Веста за повлекувањето попладнево преку Фејсбук ја соопшти самиот Пјетри, кој на локалните избори на 30 јуни беше избран за градоначалник на северниот албански град.
-Свесен за важноста на политичкиот имиџ и одлучен да преземам законско разјаснување на обвинувањата од позиција на обичен граѓанин, без да оптоварувам никого, решив да си дадам оставка од функцијата градоначалник на Скадар, пишува меѓу другото Пјетри.
Инаку, вчера беше одложено конститурањето на Советот на Општина Скадар и давањето заклетва на новоизбаниот градоначаланик Пјетри, се додека обвинителството не донесе одлука околу веродостојноста на документите дека Пјетри бил осуден од судот во Фиренца за шверц на дрога, а потоа и протеран од Италија, што ги објави опозицијата.
Лидерот на опозициската Демократска партија, Љуљзим Баша, пак по оваа објава напиша:
„Еден криминалец помалку во политиката, еден узурпатор помалку во локалната самоуправа. Ништо не се менува се додека не замине Еди Рама, водачот на политичкиот криминал“, напиша Баша.
Претходно Баша обвини дека, освен Пјетри, уште 17 градоначалници се со кримнални досиеја.
