Бројот на приговори за прекршочните налози издадени преку системот „Safe City“ значително опаѓа, покажуваат податоците на Основниот кривичен суд Скопје за април годинава.
Според судот, во текот на месецот биле поднесени вкупно 38 приговори, односно барања за поведување прекршочна постапка. Од нив, 32 се од физички лица, а 6 од правни лица.
Од Кривичниот суд информираат дека, паралелно со намалениот број нови приговори, во тек е и завршување на предметите по претходно поднесените жалби.
„Бројот на граѓаните и правните лица кои не ја прифаќаат одговорноста за сторениот прекршок и поднесуваат приговор до надлежниот суд, во четвртиот месец е значително намален, а воедно веќе се завршуваат предметите по претходно поднесените приговори“, соопштија од Основниот кривичен суд Скопје.
Системот „Safe City“ се користи за автоматска евиденција на сообраќајни прекршоци, по што се издаваат прекршочни налози, а граѓаните имаат можност да поднесат приговор доколку не ја прифаќаат одговорноста.
