Поранешната претседателка на Советот за македонски јазик, Симона Груевска-Маџоска, јавно ги образложи причините за нејзината оставка, демантирајќи ја изјавата на министерот за култура и туризам, Зоран Љутков, дека се работело за лични причини.
Во објава на Фејсбук, Груевска-Маџоска вели дека оставката ја поднела поради односот на министерот Љутков и, како што тврди, закана од државниот секретар, а не поради лични мотиви.
„Вистината е дека за една и пол година, колку што бев претседател на Советот за македонски јазик, не сум имала ниту една средба со министерот за култура и туризам“, напиша таа, додавајќи дека повеќепати безуспешно барала прием кај министерот.
Таа тврди дека речиси една година инсистирала да започне подготовката на Националната стратегија за македонскиот јазик, предвидена со Законот за употреба на македонскиот јазик, но наишла на игнорантски однос и одолговлекување.
Груевска-Маџоска посочува дека на јавна расправа за Националната стратегија за култура ѝ било кажано „да не зборува јавно“ и дека „на нивен предлог била избрана за претседател“, што го доживеала како закана. По тој настан ја поднела неотповикливата оставка.
„Мојот заклучок на крајот е дека никој не се грижи за македонскиот јазик и Господ да ни е напомош“, напиша таа.
По објавата, реагираше министерот Љутков, кој ги отфрли обвинувањата и оцени дека се работи за селективно претставување на фактите.
Тој нагласи дека одбележувањето на 80-годишнината од кодификацијата на македонскиот стандарден јазик било резултат на координирана работа на повеќе институции и порача дека останува отворен за дијалог и соработка во интерес на македонскиот јазик и културниот идентитет.
